rutong.id-Hidop semanisnya “nanas” (Carita orang Rutong)

Matahari sebelum naik lai,
papa su pake sarong parang di pinggang, lalu antua angka hati di meja sombayang
Par mau pigi di utang.
Beta liat papa antua kaluar Pintu blakang
Waktu beta ada mau mandi par pigi ka skolah.

Kasbi rabus deng kalapa sisi
akang di meja makang
Mama su siap akang
Dari ampersiang
Par katong punya sarapan ka skolah

“kaka, mama tunggu pulang skolah katong ka utang e iko papa” mama bilang par beta, sambil antua ada taru kayo di para-para.

Lonceng pulang skolah babunyi
Beta langsung pulang ka rumah,
liat mama dengan ade dong samua tunggu beta di meja makan.

Mama bilang
“Kaka baganti lalu katong makan sama-sama”

Beta liat di meja makan
Paling sadap-sadap,
ada papeda deng ikan meti.
Katong samua makan sama-sama.

“Kaka,blajar pintar-pintar e supaya bisa jadi orang, supaya bisa liat papa deng mama beso lusa”

Mama bilang bagitu, biking beta ta stop makan, ingat papa yang ada di utang.
Beta liat mama antua bicara dengan muka kasiang-kasiang,
Aer mata ni akang bisa jatuh di piring
Tapi beta tahang saja biking diri kuat.

Saat katong ka utang, beta liat papa punya
Kabong nanas ini paling banyak deng akang paling luas.

“Mama, nanas ini akang rasa manis ee”
Beta bilang par mama, sambil beta ada makan nanas, pas papa juga ada makan bakal.

“Nanas yang papa tanam deng sapuluh jare kotor ini, par kaka deng ade dong pung skolah,lalu nanti lanjut kulia”
Mama lanjut bilang,

“Nanas ini akang samua rasa manis, jika katong kalesang, jadi beso lusa kalau papa deng mama su seng ada, ingatang jaga hubungan sudara ini jaga akang manis-manis”

Beta hati ancor,
Dengar mama bilang bagitu,
Seng tahang par mau bilang
mama deng papa itu beta paling sayang.

Dalam perjalanan pulang
Sambil beta liat papa ada pikol nanas
Mama ada kekung nanas
Beta bapikir dalam hati

“Biar papa deng mama cuma petani
katong makan sabarang
Hidop kurang-kurang
Mar Beta janji,
Beta akan skolah bae-bae,
Supaya kasih bahagia papa deng mama eso lusa”

Carita ini beta lanjut,
Saat beta su kaweng
Saat beta su jadi orang
Beta liat papa deng mama tetap bakabong,
Tetap kerja, tetap hidop manis,
Sama dengan Manisnya nanas.